Gbemi begin show sign of depression when she enter secondary school. According to her mama, she go lock herself inside house and she no go talk to anybody. Sometimes, she go just begin vex for everybody for no reason. Her teacher come complain to her mama as the matter don dey become serious well well, because e don dey be like say Gbemi no come dey do well for school anymore. But Gbemi mama and papa no really know wetin dem go do for the matter wey dey ground. This na because from time, Gbemi na bright student. This na why her teacher carry the matter seriously. After like two days wey she talk to Gbemi, she come realize say e be like say Gbemi dey show some small small signs of depression. Make we kuku thank God say the school na well established school, and dem teachers dey well educated for matters like this, no be small. Folu, wey be Gbemi padi for school later talk say, she bin dey notice say Gbemi no come dey take school matter serious as before, but she no no how to tell Gbemi say she need help, make the thing no go backfire; she don believe say na small small person dey carry another person tori for head. According to her, she go always wan do everything for Gbemi. She even dey write test and assignment for her so that Gbemi no go stress herself too much. She no no say, she no dey help her Friend at all.
Many times, we feel say we suppose help pipu wey get mental illness do everything so dat dem no go do wahala. We wan fix everything for dem. We wan protect dem from danger. We wan pamper dem and carry dem like egg wey fit Scatter. The truth be say, their condition no go beta if we no tell dem the truth about their condition and allow dem see doctor quick. Some pipu even think say, pipu wey get mental illness no get mind of their own and so dem no fit do anything by their self. Wetin we need to know be say, mental illness na condition wey fit beta if we tell those wey dey affected the truth and no try to cover the matter as e be. We no need to treat dem like special pipu wey need special treatment. If wey no pamper dem too much, we go see say their condition go beta before wey know. Sometimes, the only thing wey dem need na for their friends, family or pipu around dem to dey patient with dem and to play with dem like normal pipu.
Now, many things dey wey we fit do to help pipu wey get any type of mental illness without say we wan pamper dem like pikin.
One of the first things, we fit do na to tell dem the truth of the matter and the condition wey dey ground. Mental illness no be curse or disease wey no get cure. We no need to hide anything from dem because some pipu no even believe say dem get the condition. If we observe anything from pipu wey get mental illness, na our duty to tell dem quick so dat treatment go start early and we go don help dem come out of the wahala. The truth wey we no want tell dem today, go come out tomorrow and dem fit hate us for life. Pipu wey get mental illness don come out of am after treatment and become somebody for life. In fact, plenty people wey get mental illness, them dey successful for the work wey dem dey do.
Secondly, we need to make dem dey independent. We no need to help dem do everything. Dem need to try do things alone or else dem no go learn anything. If we give dem free hand, dem go make their mistake and carry learn from their mistake. Before we know, dem go become perfect and their condition go begin beta. We no need to tell dem say dem need help from us all the time.
Thirdly, we need to play or joke with dem like normal pipu dey do. Pipu wey get mental illness no need sori for their life na. Wetin dem need na for us to yarn with dem and play with dem, and treat dem like normal people. Person wey get mental illness fit live normal life like me and you. Dem need to see us like their padi so dat dem go fit yarn with us and open up to us. Their condition go beta if dem see us as padi.
Finally, we need to realize say, if we continue to protect our pipu wey get mental illness, we go make dem feel say dem no dey good enough and their condition no go improve. Dem fit even begin get Inferiority complex wahala for school or office. We need to give dem space and encourage dem to achieve anything wey dem want for life. Afterall, many pipu including rich pipu and celebrities wey survive mental illness don become beta pipu for society.